گداگری کی مذمت

الحمد لله والصلاة والسلام على رسول الله , أما بعد :

اللہ کی پاکیزہ شریعت دین اسلام میں جن اعمال واوصاف کی مذمت کی گئی ہے ان میں سے ایک گداگری ہے ۔ یعنی  بھیک مانگنا،  لوگوں سے ان کے مال یا دیگر سامان کا سوال کرنا ، لوگوں کے سامنے ہاتھ پھیلانا ،  دست سوال دراز کرنا وغیرہ

واضح رہے کہ بلا ضرورت اور ناحق طور پر صرف اپنا مال بڑھانے کے لیے گداگری کرنا اور اسے بطور  پیشہ اپنانا انتہائی معیوب عمل اور  مذموم صفت ہے۔  بھکاری انسان خود کو دوسروں کے سامنے ذلیل ورسوا  کرتا ہے ۔  اسلام چاہتا ہے کہ ایک بندہ   اللہ کے سوا کسی اور کے سامنے خود کو ذلیل و پست نہ کرے۔ اللہ تعالی نے قران مجید میں ارشاد فرمایا :

لِلۡفُقَرَآءِ ٱلَّذِينَ أُحۡصِرُواْ فِي سَبِيلِ ٱللَّهِ لَا يَسۡتَطِيعُونَ ضَرۡبٗا فِي ٱلۡأَرۡضِ يَحۡسَبُهُمُ ٱلۡجَاهِلُ أَغۡنِيَآءَ مِنَ ٱلتَّعَفُّفِ تَعۡرِفُهُم بِسِيمَٰهُمۡ لَا يَسۡـَٔلُونَ ٱلنَّاسَ إِلۡحَافٗاۗ وَمَا تُنفِقُواْ مِنۡ خَيۡرٖ فَإِنَّ ٱللَّهَ بِهِۦ عَلِيمٌ [البقرة: 273] 

صدقات کے مستحق صرف وہ غربا ہیں جو اللہ کی راہ میں روک دیئے گئے، جو ملک میں چل پھر نہیں سکتے ۔ نادان لوگ ان کی بے سوالی کی وجہ سے انہیں مالدار خیال کرتے ہیں، آپ ان کے چہرے دیکھ کر قیافہ سے انہیں پہچان لیں گے وہ لوگوں سے چمٹ کر سوال نہیں کرتے ۔ تم جو کچھ مال خرچ کرو تو اللہ تعالیٰ اس کا جاننے والا ہے۔

اس آیت میں  اللہ تعالی نے صدقات وخیرات کا مستحق ان افراد کو قرار دیا جو  فقیر و  محتاج   ہیں لیکن اللہ کی راہ میں محصور ومشغول ہونے کی بنا پر زمین میں ادھر ادھر چل پھر کر کے اور بھاگ دوڑ کرکے اپنا رزق  کما نہیں سکتے اور ایک نادان  حقیقی صورت حال کے برخلاف یہ سمجھتا ہے کہ وہ غنی  اور  دولت مند ہیں، اس کی وجہ یہ ہے کہ وہ پاکدامنی اختیار کرتے ہیں   اور  لوگوں سے اصرار کے ساتھ سوال نہیں کرتے۔  اللہ سبحانہ  نے مزید فرمایا کہ تم جو بھی مال اور خیر و بھلائی خرچ کرو  گے اللہ سب کا علم رکھتا ہے۔  

امام ابن کثیر رحمہ اللہ اس کی تفسیر میں فرماتے ہیں کہ یہ لوگ سوال کرنے میں اصرار نہیں کرتے،  الحاح نہیں کرتے یعنی جس چیز کے حاجت مند نہیں ہوتے اس کا لوگوں کو مکلف نہیں کرتے۔  جو شخص کسی ایسی چیز کا سوال کرے جس کی اسے حاجت نہیں ہے،یعنی  جس سوال سے وہ بچ سکتا ہے پھر بھی اس طرح کا سوال کرے تو وہ سوال کرنے میں اصرار والحاح  اور الحاف  کا مرتکب ہے۔

 ابو ہریرہ رضی اللہ عنہ کی  ایک حدیث ہے کہ اللہ کے نبی صلی اللہ علیہ وعلی آلہ وسلم نے ارشاد فرمایا :

”لَيْسَ الْمِسْكِينُ الَّذِي يَطُوفُ عَلَى النَّاسِ تَرُدُّهُ اللُّقْمَةُ وَاللُّقْمَتَانِ وَالتَّمْرَةُ وَالتَّمْرَتَانِ وَلَكِنْ الْمِسْكِينُ الَّذِي لَا يَجِدُ غِنًى يُغْنِيهِ وَلَا يُفْطَنُ بِهِ فَيُتَصَدَّقُ عَلَيْهِ وَلَا يَقُومُ فَيَسْأَلُ النَّاسَ“۔ (صحیح بخاری /1478 ، و صحیح مسلم / 1039 )  

  ’’مسکین وہ نہیں جو لوگوں کا طواف کرتا پھرے اور ایک دولقمے یا ایک دوکھجوریں اسے ادھر اُدھر گردش کراتی رہیں، بلکہ مسکین وہ شخص ہے جو اس قدر مالداری نہ پائے جو اسے بے نیاز کردے اور کسی کو اس کاپتہ بھی نہ چل سکے کہ وہ اس پر صدقہ کرے اور نہ وہ کھڑا ہوکر لوگوں سے مانگتا ہی پھرے۔‘‘

حدیث سے معلوم ہوا کہ مسکین اور محتاج وہ نہیں ہے جو لوگوں کے گھروں کے چکر لگاتا ہے،  ایک لقمہ یا دو لقمہ پا کر لوٹ جاتا ہے،  ایک کھجور یا دو کھجور پا کے پھر نئے گھر کی تلاش میں چل پڑتا ہے،  یعنی در در کا بھکاری مسکین اور فقیر نہیں ہے۔ یہ سن کر  لوگوں نے اللہ کے نبی  سےسوال کیا کہ   پھر آخر مسکین ، حاجت مند ، ضرورت مند ، فقیر  اور غریب کون ہے؟  تو اللہ کے نبی صلی اللہ علیہ وسلم نے وضاحت فرمائی کہ مسکین  وہ شخص ہے  جس کو اس کی کفایت نہ مل سکے، اس کو اتنا مال و دولت میسر نہ ہو جس  سے اس کی ضرورتیں پوری ہو جائیں،  اورساتھ ہی معاملہ یہ ہو کہ  لوگ اس کی غریبی کو جان بھی نہ سکیں کہ کوئی اس پر صدقہ کر دے،  اور وہ لوگوں سے سوال بھی نہیں کرتا ،  لوگوں سے کچھ مانگتا نہیں اور لوگ  اس کی غریبی ومحتاجی کو سمجھتے بھی نہیں لہٰذا اسے صدقہ بھی نہیں دیتے۔   یعنی اس کی حالت یہ ہے کہ اس کی ضرورتیں پوری نہیں ہو پاتی اور کوئی اسے صدقہ بھی نہیں دیتا اور کسی دوسری طرح مدد بھی نہیں کرتا۔ معاشرے کے ایسے غریب لوگوں کا خیال رکھنے کی سخت ضرورت ہے۔

ابو ہریرہ رضی اللہ عنہ کی  ایک اورحدیث ہے کہ اللہ کے نبی صلی اللہ علیہ وعلی آلہ وسلم نے ارشاد فرمایا :

”مَنْ سَأَلَ النَّاسَ أَمْوَالَهُمْ تَكَثُّرًا فَإِنَّمَا يَسْأَلُ جَمْرًا فَلْيَسْتَقِلَّ أَوْ لِيَسْتَكْثِرْ  “۔ (صحیح مسلم  / 1041 )

’’جو شخص مال بڑھانے کے لئے لوگوں سے ان کا مال مانگتا ہے وہ آگ کے انگارے مانگتا ہے، کم (اکھٹے) کر لے یا زیادہ کر لے۔‘‘

یعنی جو شخص لوگوں سے ان کا مال مانگے، گداگری کرے،  مقصد یہ ہو کہ اپنا مال بڑھا لے ، زیادہ دولت مند ہو جائے،  اسی مقصد سے لوگوں سے مانگتا پھرتا ہے تو  ایسا شخص آگ کا شعلہ مانگ رہا ہے ، آگ کا شعلہ جمع کر رہا ہے،  اب اس کی مرضی ہے چاہے تو زیادہ جمع کرے چاہے کم جمع کرے۔

امام ابو حامد الغزالی کہتے ہیں کہ سوال دراصل حرام ہے اور کسی ضرورت یا سخت حاجت کی بنا پر جو کہ ضرورت سے قریب ہو جائز قرار دیا گیا ہے،  کیونکہ اس میں اللہ تعالی سے ایک طرح کی شکایت ہے،  اور اس بات کا اعلان ہے کہ اللہ کی جو نعمتیں دوسروں کو میسر ہیں اس کے پاس اس کی کمی ہے،  اور اس کمی کی وجہ سے وہ دوسروں کے آگے ہاتھ پھیلا رہا ہے، تو یہ بھی ایک طرح کی شکایت ہے۔ دوسری بات یہ ہے  کہ انسان گداگری کر کے خود کو غیر اللہ کے سامنے ذلیل اور پست کر تا ہے۔ تیسری خرابی گداگری میں  یہ ہے  کہ  جس بندے سے سوال کیا جا رہا ہے عام طور پر ان کی بھی ایذا رسانی اور تکلیف کا باعث ہوتا ہے۔ کبھی کبھی آدمی دینا نہیں چاہتا لیکن حیا اور شرم کی بنا پر یا دکھاوے کی بنا پر دے دیتا ہے اور ظاہر ہے کہ ایسی صورت میں لینے والے کے لیے لینا حرام ہے۔  ابھی جو باتیں ذکر کی گئیں وہ ابو حامد الغزالی نے کہی ہیں۔

نبی کریم صلی اللہ علیہ وسلم نے اپنی ایک حدیث میں اس بات کی وضاحت فرمائی ہے کہ مانگنا کس کے لیے حلال ہے، چنانچہ قبیصہ رضی اللہ عنہ فرماتے ہیں کہ اللہ کے نبی صلی اللہ علیہ والہ وسلم نے ارشاد فرمایا :

”إِنَّ الْمَسْأَلَةَ لَا تَحِلُّ إِلَّا لِأَحَدِ ثَلَاثَةٍ رَجُلٍ تَحَمَّلَ حَمَالَةً فَحَلَّتْ لَهُ الْمَسْأَلَةُ حَتَّى يُصِيبَهَا ثُمَّ يُمْسِكُ وَرَجُلٌ أَصَابَتْهُ جَائِحَةٌ اجْتَاحَتْ مَالَهُ فَحَلَّتْ لَهُ الْمَسْأَلَةُ حَتَّى يُصِيبَ قِوَامًا مِنْ عَيْشٍ أَوْ قَالَ سِدَادًا مِنْ عَيْشٍ وَرَجُلٌ أَصَابَتْهُ فَاقَةٌ حَتَّى يَقُومَ ثَلَاثَةٌ مِنْ ذَوِي الْحِجَا مِنْ قَوْمِهِ لَقَدْ أَصَابَتْ فُلَانًا فَاقَةٌ فَحَلَّتْ لَهُ الْمَسْأَلَةُ حَتَّى يُصِيبَ قِوَامًا مِنْ عَيْشٍ أَوْ قَالَ سِدَادًا مِنْ عَيْشٍ فَمَا سِوَاهُنَّ مِنْ الْمَسْأَلَةِ يَا قَبِيصَةُ سُحْتًا يَأْكُلُهَا صَاحِبُهَا سُحْتًا “۔ (صحیح مسلم/ 1044 )

’’ تین قسم کے افراد میں سے کسی ایک کے سوا اور کسی کے لئے سوال کرنا جائز نہیں: ایک وہ آدمی جس نے کسی بڑی ادائیگی کی ذمہ داری قبول کر لی، اس کے لئے اس وقت تک سوال کرنا حلال ہو جاتا ہے حتیٰ کہ اس کو حاصل کر لے، اس کے بعد (سوال سے) رک جائے، دوسرا وہ آدمی جس پر کوئی آفت آ پڑی ہو جس نے اس کا مال تباہ کردیا ہو، اس کے لئے سوال کرنا حلال ہو جاتا ہے یہاں تک کہ وہ زندگی کی گزران درست کر لے۔ یا فرمایا: زندگی کی بقا کا سامان کرلے۔اور تیسرا وہ آدمی جو فاقے کا شکار ہو گیا، یہاں تک کہ اس کی قوم کے تین عقلمند افراد کھڑے ہو جائیں (اور کہہ دیں) کہ فلاں آدمی فاقہ زدہ ہو گیا ہے تو اس کے لئے بھی مانگنا حلال ہو گیا یہاں تک کہ وہ درست گزران حاصل کرلے۔ یا فرمایا: زندگی باقی رکھنے جتنا حاصل کر لے ۔اے قبیصہ! ان صورتوں کے سوا سوال کرنا حرام ہے اور سوال کرنے والا حرام کھاتا ہے۔‘‘

یعنی صرف تین لوگوں کے لئے سوال کرنا حلال  ہے ، ایک وہ شخص جس نے کوئی بوجھ اٹھا لیا ہو ، بوجھ اٹھانے کا مطلب یہ ہے کہ  کسی کی قرض کی ادائیگی کی ذمہ داری خود پر لے لی ہو یا کسی سے غلطی سے خون ہو گیا اور اس کی دیت ادا کرنے کی ذمہ داری اس نے اٹھا لی ہو تو ان صورتوں میں جب اس نے کسی غیر کا بوجھ اپنے اوپر اٹھا لیا ہے تو  ظاہر ہے کہ اپنے ذاتی مال سے یہ بوجھ نہیں ادا کر سکتا ہے  بلکہ لوگوں سے سوال کر کے ہی یہ ذمہ داری پوری کرے گا  لہٰذا  ایسی صورت میں اس کے لیے سوال کرنا حلال ہے یہاں تک کہ ذمہ داری پوری کرنے کے لائق ہو جائے۔  لیکن یاد رہے کہ  جب ذمہ داری پوری ہو جائے تو پھر سوال کرنے سے رک جائے۔

 دوسرا شخص وہ ہے کہ جس پر کوئی آسمانی مصیبت آ پڑی جس کی وجہ سے اس کا مال برباد ہو گیا، جیسے آگ لگ گئی یا کسی قسم کی تباہی آگئی، یا اس نے کھیتی کی تھی لیکن کھیتیوں پر کوئی آفت آگئی،  کوئی طوفان آگیا یا کسی بھی طرح کی زمینی یا  آسمانی مصیبت آگئی جس کی بنا پر اس کا سارا مال تباہ  وبرباد ہو گیا ، ایسی صورت میں اس کے لیے سوال کرنا حلال ہے یہاں تک کہ وہ سامان گزارا حاصل کر لے۔

  تیسرا شخص جس کے لئے سوال کرنا حلال ہے وہ ہے  جو فاقہ زدہ ہو گیا،  یعنی مالدار تھا،  دولت مند تھا لیکن کسی بنا پر فقر و محتاجی کا شکار ہو گیا اور فاقہ کشی یعنی بھوکے رہنے کی نوبت آگئی تو ایسی صورت میں قوم کے تین عقلمند لوگ اس بات کی گواہی دیں کہ فلاں فاقہ کا شکار ہو گیا ہے ، اب اس کے لیے سوال کرنا حلال ہوگا یہاں تک کہ وہ سامان ضرورت پا جائے۔

 ان کے علاوہ  سوال وگداگری کی تمام صورتیں اور  مانگنے کی ساری شکلیں سب کے سب حرام ہیں۔  مانگنے کا عمل حرام ہے اور اس کی آمدنی کا استعمال حرام خوری ہے۔

سمرہ بن جندب رضی اللہ عنہ سے روایت ہے کہ اللہ کے نبی صلی اللہ علیہ وسلم نے فرمایا:

” إِنْ الْمَسْأَلَةَ كَدٌّ يَكُدُّ بِهَا الرَّجُلُ وَجْهَهُ إِلَّا أَنْ يَسْأَلَ الرَّجُلُ سُلْطَانًا أَوْ فِي أَمْرٍ لَا بُدَّ مِنْهُ “۔ ( سنن ترمذی /  681 )  

’’مانگنا ایک زخم ہے جس سے آدمی اپنا چہرہ زخمی کر لیتا ہے، سوائے اس کے کہ آدمی حاکم سے مانگےيا کسی ایسے کام کے لیے مانگے جو ضروری اور ناگزیر ہو‘‘۔

یعنی سوال کرنے والا انسان اپنی شرم وحیا کی چادر اتار کر بے لباس ہوجاتا ہے اور  اپنی عزت و آبرو ضائع کرلیتا ہے  لیکن یاد رہے کہ وہ اگر   اپنے حاکم یا بادشاہ سے سوال کر رہا ہے یا کسی انتہائی مجبوری اور ضرورت میں سوال کر رہا ہے تو اس کا معاملہ مختلف ہے۔

 امام سلمان  فرماتے ہیں کہ جہاں تک حاکم اور بادشاہ سے سوال کرنے کی بات ہے تو اس میں کوئی ملامت اور مذمت نہیں ہے اس لیے کہ بیت المال میں تمام لوگوں کا حق ہے۔   اسی طرح   اگر بادشاہ اپنی رعایا کو دیتا ہے، ان پر خرچ کرتا ہے، تو اس میں مانگنے والے پر اس کا کوئی احسان نہیں ہے کیونکہ وہ وکیل ہے، بیت المال کے مال کا مالک نہیں بلکہ امین ہے۔  مال کو اپنی رعایا میں تقسیم کرنا اس کی ذمہ داری ہے۔   جیسے ایک انسان اپنے وکیل سے اپنا حق طلب کرتا ہے اسی طرح اگر  کوئی حاکم سے طلب کرتا ہے تو وہ اپنا ہی حق مانگ رہا ہے، اس لیے اس میں کوئی ملامت اور مذمت کی بات نہیں ہے۔

اللہ کے نبی صلی اللہ علیہ وسلم نے اس بات کی بھی وضاحت فرما دی ہے کہ آدمی کے پاس کتنا مال ومتاع  اور کتنا سازوسامان ہو تو اس کے لیے سوال کرنا حرام ہوتا ہے، چنانچہ مسند احمد کی حدیث ہے کہ نبی صلی اللہ علیہ وسلم نے فرمایا :

" إِنَّهُ مَنْ سَأَلَ وَعِنْدَهُ مَا يُغْنِيهِ، فَإِنَّمَا يَسْتَكْثِرُ مِنْ جَمْرِ جَهَنَّمَ ". قَالُوا: يَا رَسُولَ اللهِ، وَمَا يُغْنِيهِ؟ قَالَ: " مَا يُغَدِّيهِ أَوْ يُعَشِّيهِ ".

”جو شخص سوال کرے  حالانکہ اس کے پاس اتنا موجود ہو جس سے اس کی ضرورت پوری ہوسکتی ہے، تو وہ جہنم کے انگاروں میں اضافہ کرتا ہے، صحابہ رضی اللہ عنہم نے پوچھا :یا رسول اللہ! ضرورت  پوری کرنے والی چیز سے کیا مراد ہے؟ فرمایا : کھانا     ۔“

 یعنی اگر  کسی شخص  کے پاس صبح یا شام کسی ایک وقت کے کھانے کا انتظام  ہے تو پھر وہ دولت مند ہے ، اسے سوال کرنے کی اجازت نہیں ہے۔  اس  حدیث کی سند کو محققین نے صحیح قرار دیا ہے۔

 اسی طرح سے صحیح بخاری کی ایک  حدیث ہے  جو زبیر بن عوام رضی اللہ عنہ سے مروی ہے کہ اللہ کے نبی صلی اللہ علیہ وسلم نے فرمایا:

«"لَأَنْ يَأْخُذَ أَحَدُكُمْ حَبْلَهُ فَيَأْتِيَ بِحُزْمَةِ الْحَطَبِ عَلَى ظَهْرِهِ فَيَبِيعَهَا فَيَكُفَّ اللَّهُ بِهَا وَجْهَهُ، خَيْرٌ لَهُ مِنْ أَنْ يَسْأَلَ النَّاسَ أَعْطَوْه ‌أَوْ ‌مَنَعُوهُ".»«صحيح البخاري / 1471 »

” تم میں سے کوئی رسی لے اور لکڑیوں کا گٹھا اپنی پشت پر لاد کر لائے اور اسے فروخت کرے۔ اللہ تعالیٰ اس وجہ سے اس کے چہرے کو سوال سے بچائے تو یہ اس کے لیے اس سے بہتر ہے کہ وہ لوگوں سے مانگتا پھرے، وہ اسے دیں یا نہ دیں۔‘‘

یعنی ایک آدمی اپنی رسی لے اور جا کر کے اپنی پیٹھ پر لکڑیوں کا بوجھ ڈھوئے اور اس کی تجارت کرے،  اسے بیچے اور اس طرح سے اپنی عزت و آبرو کی اور اپنے چہرے کے پانی کی حفاظت کرے،  یہ اس سے کہیں بہتر ہے کہ لوگوں سے سوال کرتا پھرے، لوگوں سے بھیک مانگتا پھرے،  لوگ اسے دیں یا نہ دیں۔ کوئی دے رہا ہے، کوئی نہیں دے رہا ہے، انسان خود کو لوگوں کے سامنے ذلیل  وخوارکررہا ہے۔  اس سے بہتر ہے کہ محنت و مشقت کرے اور اس کے ذریعے سے اپنا رزق حاصل کرے۔

 اسی طرح سے  ایک اور حدیث  ہے  جس میں اللہ کے نبی صلی اللہ علیہ وسلم نے فرمایا ہے :

”وَلَا فَتَحَ عَبْدٌ ‌بَابَ ‌مَسْأَلَةٍ إِلَّا فَتَحَ اللَّهُ عَلَيْهِ بَابَ فَقْرٍ“( سنن ترمذی/ 2325) 

(اگر کوئی شخص اپنے کے لیے سوال کا دروازہ کھولتا ہے تو اللہ اس کے لیے فقرومحتاجی کا دروازہ کھول دیتا ہے)۔

یعنی جب کوئی بندہ اپنے لیے سوال  اور گداگری کے دروازے کھول دیتا ہے ، لوگوں سے مانگنے لگ جاتا ہے تو پھر اس کا نتیجہ یہ ہوتا ہے کہ  اس کے سامنے فقر و محتاجی کا دروازہ کھل جاتا ہے۔ پھر اس کی ضروریات ختم ہونے کا نام ہی نہیں لیتی، اور وہ ہمیشہ کے لئے بھکاری بن جاتا ہے۔

اللہ کے نبی صلی اللہ علیہ وسلم نے اپنے صحابہ کی تربیت اس طور  پر کی تھی  کہ وہ گدا گری سے نفرت کریں اور محنت و مشقت کر کے اپنا رزق حاصل کریں ۔

اللہ کے رسول صلی اللہ علیہ وسلم  نے اپنے صحابہ کو یہ نصیحت کی تھی کہ وہ لوگوں سے دنیاوی ساز و سامان اور مال و متاع طلب نہ کیا کریں۔  چنانچہ صحیح بخاری اور صحیح مسلم میں حکیم ابن حزام رضی اللہ عنہ کی روایت ہے:

”سَأَلْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ فَأَعْطَانِي ثُمَّ سَأَلْتُهُ فَأَعْطَانِي ثُمَّ سَأَلْتُهُ فَأَعْطَانِي ثُمَّ قَالَ يَا حَكِيمُ إِنَّ هَذَا الْمَالَ خَضِرَةٌ حُلْوَةٌ فَمَنْ أَخَذَهُ بِسَخَاوَةِ نَفْسٍ بُورِكَ لَهُ فِيهِ وَمَنْ أَخَذَهُ بِإِشْرَافِ نَفْسٍ لَمْ يُبَارَكْ لَهُ فِيهِ كَالَّذِي يَأْكُلُ وَلَا يَشْبَعُ الْيَدُ الْعُلْيَا خَيْرٌ مِنْ الْيَدِ السُّفْلَى قَالَ حَكِيمٌ فَقُلْتُ يَا رَسُولَ اللَّهِ وَالَّذِي بَعَثَكَ بِالْحَقِّ لَا أَرْزَأُ أَحَدًا بَعْدَكَ شَيْئًا حَتَّى أُفَارِقَ الدُّنْيَا“

حکیم رضی اللہ عنہ کہتے ہیں کہ میں نے ایک دفعہ رسول اللہ ﷺ سے کچھ مانگا تو آپ نے مجھے دے دیا، میں نے پھر مانگا تو بھی آپ نے مجھے دے دیا، میں نے پھر مانگا تو آپ نے مجھے پھر بھی دے دیا اور اس کے بعد فرمایا:’’حکیم! یہ مال سبزوشریں ہے۔ جو شخص اس کو سخاوت نفس کے ساتھ لیتا ہے اسے برکت عطا ہوتی ہے۔ اور جوطمع کے ساتھ لیتا ہے۔ اس کواس میں برکت نہیں دی جاتی اور ایسا آدمی اس شخص کی طرح ہوتا ہے جو کھاتا تو ہے مگر سیر نہیں ہوتا، نیز اوپر والا ہاتھ نیچے والے ہاتھ سے بہتر ہے۔‘‘ حکیم  رضی اللہ عنہ کہتے ہیں:میں نے عرض کیا:اللہ کے رسول ﷺ !اس ذات کی قسم جس نے آپ کوحق دے کر بھیجا ہے!میں آپ کے بعد کسی سے کچھ نہیں مانگوں گا یہاں تک کہ دنیا سے چلاجاؤں۔

چنانچہ ابوبکر صدیق رضی اللہ عنہ حکیم رضی اللہ عنہ کو عطیہ دینے کے لیے بلاتے تھے تو وہ قبول کرنے سے منع کرتے تھے ، کہتے تھے مجھے قبول نہیں ہے، مجھے نہیں چاہیے۔  ایسے ہی عمر رضی اللہ عنہ بھی انہیں عطیہ دینے کے لیے بلاتے تھے تو وہ قبول نہیں کیا کرتے تھے۔  عمر رضی اللہ عنہ نے مسلمانوں کو گواہ بنا کر کے کہا کہ اے مسلمانو! میں تمہیں گواہ بناتا ہوں کہ میں حکیم کومال غنیمت میں ان کا حق دے رہا ہوں ، بیت المال سے ان کا حق دے رہا ہوں لیکن وہ لینے سے انکار کر رہے ہیں۔

چنانچہ  حکیم رضی اللہ عنہ نے  اللہ کے رسول صلی اللہ علیہ وسلم سے اپنے کئے وعدے کے مطابق کسی سے کسی چیز کا  کبھی مطالبہ نہیں کیا  یہاں تک کہ وفات ہو گئی۔

 تو یہ ایک مثال ہے کہ اللہ کے  نبی کریم صلی اللہ علیہ وسلم  نے اپنے صحابہ کی تربیت  کس طرح کی تھی  کہ  صحابۂ کرام  گداگری سے بہت دور رہا کرتے تھے۔

آج بڑی افسوسناک صورت حال ہے کہ بہت سارے لوگ گداگری کو سب سے آسان ذریعۂ معاش تصور کرتے ہیں، محنت ومشقت کے بجائے تن آسانی اور مفت خوری کو پسند کرتے ہیں۔  

اللہ تعالی سے دعا ہے کہ مولائے کریم  گداگری کی تمام صورتوں سے ہماری حفاظت فرمائے اور ہمیں اپنے فضل وکرم سے رزق حلال سے  نوازے اور اپنی برکتوں سے  مالامال فرمائے۔  آمین

وآخر دعوانا أن الحمد لله رب العالمين وصلى الله على نبينا وسلم.

(اعداد : عبدالہادی عبدالخالق مدنی)

 

 

محرمات يوم الجمعة

جمعہ کے دن کی ممنوعات ومحرمات

          جمعہ کے دن بعض چیزیں حرام ہیں جو مندرجہ ذیل ہیں:

          ۱۔ دوسری اذان ہوجانے کے بعد خرید وفروخت کرنا۔ اﷲ عزوجل کا ارشاد ہے: یَا أَیُّہَا الَّذِیْنَ آمَنُوْا إِذَا نُودِيَ لِلصَّلاَۃِ مِن یَّوْمِ الْجُمُعَۃِ فَاسْعَوْا إِلَیٰ ذِکْرِ اللهِ وَذَرُوا الْبَیْعَ ذَالِکُمْ خَیْرٌ لَّکُمْ إِنْ کُنْتُمْ تَعْلَمُوْنَ (الجمعہ؍۹)[اے وہ لوگو جو ایمان لائے ہو ! جمعہ کے دن صلاۃ کے لئے اذان دی جائے تو تم اﷲ کے ذکر کی طرف دوڑ پڑو اور خرید و فروخت چھوڑدو ۔ یہ تمھارے حق میں بہت ہی بہتر ہے اگر تم جانتے ہو۔]

          ۲۔ لوگوں کی گردنیں پھلانگنا اور دو شخصوں کے درمیان تفریق کرنا۔ عبد اﷲ بن بسر رضی اللہ عنہ کی روایت ہے کہ ایک شخص لوگوں کی گردنیں پھلانگتے ہوئے آیا اس حال میں کہ نبی ﷺ خطبہ دے رہے تھے تو رسول اﷲ ﷺ نے اس سے فرمایا: ’’بیٹھ جا تونے تکلیف دی اور دیر سے پہنچا‘‘۔  (ابوداؤد، صحیح نسائی، احمد)

          ۳۔  اپنے کسی مسلمان بھائی کو اس کی نشست سے اٹھا کر خود اس کی جگہ بیٹھ جانا۔ عبد اﷲ بن عمر رضی اللہ عنہما  فرماتے ہیں : نبی ﷺ نے منع فرمایا ہے کہ کوئی شخص اپنے (مسلمان) بھائی کو اس کی نشست سے اٹھادے اور خود اس کی جگہ بیٹھ جائے ۔ ابن عمر رضی اللہ عنہما کے غلام نافع رحمہ اﷲ سے پوچھا گیا: جمعہ میں؟ آپ نے فرمایا: جمعہ میں اور اس کے علاوہ میں بھی ۔ (صحیح بخاری)

          ۴۔ صلاۃ جمعہ سے پہلے مسجد میں حلقے بناکے بیٹھنا۔ عمرو بن شعیب اپنے باپ سے ، وہ اپنے دادا سے روایت کرتے ہیں کہ رسول اﷲ ﷺ نے منع فرمایا ہے مسجد میں خرید وفروخت کرنے سے ، کسی گمشدہ چیز کا اعلان کرنے سے ، (فحش اور لغو) شعر پڑھنے سے نیز صلاۃ جمعہ سے پہلے حلقہ بناکر بیٹھنے سے بھی منع فرمایا ہے۔ (ابوداود)

          ۵۔ خطبۂ جمعہ کے اندر امام اور مقتدی کا ہاتھ اٹھا کر دعا کرنا سوائے استسقاء کے جیسا کہ انس بن مالک صنے نبی ﷺ سے روایت کی ہے (صحیح بخاری) نبی ﷺ سے ثابت ہے کہ جب آپ نے خطبۂ جمعہ کے اندر استسقاء کی دعا کے لئے ہاتھ اٹھائے تو لوگوں نے بھی اپنے ہاتھ اٹھائے۔ (صحیح بخاری)

          ۶۔ تنہا جمعہ کے دن صوم رکھنا اور صرف اسی کی رات قیام کرنا۔ نبی ﷺ کا ارشاد ہے: جمعہ کی رات کو قیام (تہجد) کے لئے خاص نہ کرو اورتمام دنوں کے درمیان میں سے  جمعہ کے دن کو صیام کے لئے مخصوص نہ کروسوائے اس صورت کے کہ کوئی ایسا صوم پڑجائے جسے تم رکھا کرتے تھے۔ (صحیح مسلم)نیز ارشاد ہے: تم میں سے کوئی جمعہ کے دن (خصوصی طور پر) ہرگز صوم نہ رکھے سوائے اس صورت کے کہ اس سے ایک دن پہلے یا ایک دن بعد بھی صوم رکھے۔ (متفق علیہ)

متفرق مسائل

          ۱۔ جس نے جمعہ کی ایک رکعت پالی اس نے جمعہ کی صلاۃ پالی ، بس دوسری رکعت اس سے ملاکر پوری کرلے لیکن جس شخص کو ایک رکعت سے کم صلاۃ مل سکی تو اسے ظہر پڑھنا ہوگا۔ ابن مسعود رضی اللہ عنہ کا قول ہے: جب تم جمعہ کی ایک رکعت پاؤ تو اس کے ساتھ دوسری رکعت ملالو لیکن اگر (دوسری رکعت کا) رکوع فوت ہوجائے تو چار رکعتیں پڑھو ۔ (اسے البانی نے ارواء میں صحیح قرار دیا ہے)

          ۲۔ نیند کا غلبہ ہونے کی صورت میں اپنی جگہ بدل کر دوسری جگہ چلاجائے۔ نبی ﷺ کا ارشاد ہے: جب تم میں سے کسی کو جمعہ کے دن اونگھ آئے تو اپنی اس نشست کو بدل لے۔(صحیح ترمذی ، ابوداؤد)

          ۳۔ جو شخص کسی شرعی عذر مثلا بیماری وغیرہ یا کسی اور وجہ سے مسلمانوں کے ساتھ صلاۃ جمعہ کی ادائیگی کے لئے نہیں حاضر ہوسکا وہ صلاۃ ظہر پڑھے گا اور یہی حکم عورتوں ، مسافروں اور خانہ بدوشوں کا ہے ، سنت کی دلالت یوں ہی ہے اور جمہور اہل علم کا یہی قول ہے۔ (مجموع فتاوی شیخ ابن باز)

          ۴۔ مسافر پر جمعہ نہیں ہے کیونکہ نبی ﷺ اپنے اسفار میں جمعہ نہیں پڑھاکرتے تھے ۔ حجۃ الوداع میں عرفات کے میدان میں جمعہ کا دن تھا لیکن آپ نے جمعہ پڑھنے کے بجائے ظہر وعصر کو ایک ساتھ جمع تقدیم کرکے ادا کیا ، ایسے ہی خلفاء راشدین وغیرہ نے بھی کیاہے۔

          ۵۔ شہر اور دیہات ہر جگہ صلاۃ جمعہ قائم کی جائے گی۔ ابن عباس رضی اللہ عنہ فرماتے ہیں : مسجد نبوی میں جمعہ کے بعد سب سے پہلا جمعہ بحرین کے اندر مقام جواثی میں قبیلہ عبد القیس کی مسجد میں پڑھا گیا ۔ (صحیح بخاری) عثمان بن ابی شیبہ فرماتے ہیں : جواثی قبیلہ عبد القیس کے دیہاتوں میں سے ایک گاؤں کا نام ہے۔ (ابوداؤد)

والحمد للہ رب العالمین وصلی اللہ علی نبینا وسلم

اعداد :   عبد الہادی عبد الخالق مدنی 

 

 

 

 

 

مستحبات يوم الجمعة

جمعہ کے دن کے مستحب اعمال:

          جمعہ کے دن چند کام مستحب ہیں ، جن میں سے چند یہ ہیں:

          ۱۔ صلاۃ فجر میں پہلی رکعت میں سورہ سجدہ اور دوسری رکعت میں سورہ دہر کی تلاوت (متفق علیہ)

          ۲۔ نبی ﷺ پر بہ کثرت درود بھیجنا۔ رسول اﷲ ﷺ کا ارشاد ہے:’’ تمھارے دنوں میں سب سے افضل دن جمعہ کا دن ہے ، اسی دن آدم علیہ السلام پیدا کئے گئے اور اسی دن ان کی روح قبض کی گئی اور اسی دن صور پھونکا جائے گا اور اسی دن لوگ (قیامت کے لئے )بے ہوش ہوں گے، اس دن مجھ پر زیادہ سے زیادہ درود بھیجوکیونکہ تمھارا درود مجھ پر پیش کیا جائے گا۔ صحابہ نے عرض کیا : اے اﷲ کے رسول! ہمارا درود آپ پر کیسے پیش کیا جائے گا جب کہ آپ بوسیدہ ہوچکے ہوں گے ، آپ نے فرمایا: اﷲ عزوجل نے انبیاء علیہم السلام کے جسموں کو زمین پر حرام کردیا ہے ‘‘۔ (صحیح نسائی وابوداؤد)

          ۳۔ سورہ کہف کی تلاوت ۔ رسول اﷲ ﷺ کا ارشاد ہے: ’’جس نے جمعہ کے دن سورہ کہف کی تلاوت کی اس کے لئے ایک جمعہ سے لے کر دوسرے جمعہ تک نور کی چمک ہوگی‘‘۔(اسے حاکم نے روایت کیا ہے اور البانی نے إرواء میں صحیح قرار دیا ہے)

          ۴۔ غسل کرنا۔ نبی ﷺ کا ارشاد ہے: ’’جب تم میں سے کوئی جمعہ کے لئے آئے تو چاہئے کہ غسل کرے‘‘۔ (متفق علیہ) جمعہ کے دن غسل کا نبی ﷺ کا حکم وجوب کے لئے نہیں بلکہ استحباب کے لئے ہے جس کی دلیل آپ ﷺ کا یہ قول ہے کہ’’ جس نے جمعہ کے دن وضو کیا توسنت اور اچھی چیز ہے اور جس نے غسل کیا تو غسل افضل ہے‘‘۔ (صحیح ترمذی وصحیح نسائی)

          ۵۔ مسواک کرنا اور خوشبو لگانا۔ رسول ﷺ نے فرمایا: ’’ہر بالغ کو جمعہ کے دن غسل اور مسواک کرنا چاہئے نیز جس قدر میسر ہو خوشبو لگانی چاہئے‘‘۔(صحیح مسلم)

          ۶۔ حسب استطاعت عمدہ لباس پہننا ۔ رسول اﷲ ﷺ نے فرمایا:’’ جس نے جمعہ کے دن غسل کیا اور خوشبو لگائی اگر اس کے پاس ہے اور اپنا عمدہ لباس پہنا پھر سکون کے ساتھ چل کر مسجد پہنچا پھر چاہا تو نفل صلاۃ پڑھی اور کسی کو تکلیف نہیں دی پھرجب امام نکلا تو خاموش رہا یہاں تک کہ صلاۃ ادا کی تو اس کا یہ عمل ایک جمعہ سے دوسرے جمعہ تک کا کفارہ ہوجائے گا‘‘۔ (مسند احمد) نیز نبی ﷺ نے فرمایا:’’ تم پہ کوئی حرج نہیں اگر تم میں سے کوئی پاسکے تواپنے کام کے کپڑوں کے سوا جمعہ کے لئے دو خاص کپڑے بنالے ‘‘۔(سنن ابی داؤد وابن ماجہ)

          ۷۔ صلاۃ کے لئے جلدی نکلنا ۔ رسول اﷲ ﷺ نے فرمایا: ’’جس نے جمعہ کے دن غسل جنابت کی پھر مسجد گیا تو گویا اس نے ایک اونٹ کا صدقہ کیا اور جو دوسری ساعت میں گیا گویا گائے کا صدقہ کیا اور جو تیسری ساعت میں گیا گویا اس نے سینگ دار دنبے کا صدقہ کیا اور جو چوتھی ساعت میں گیا تو گویا اس نے مرغی کا صدقہ کیا اور جو پانچویں ساعت میں گیا تو گویا اس نے انڈے کا صدقہ کیا پھر جب امام نکل آتا ہے تو فرشتے ذکر ونصیحت سننے کے لئے حاضر ہوجاتے ہیں‘‘۔ (متفق علیہ)

          ۸۔ امام کے نکلنے تک نفلی صلاۃ اور ذکر میں مشغول رہنا ۔

           رسول اﷲ ﷺ کا ارشاد ہے: جس نے غسل کیا پھر جمعہ کو آیا اور جتنا مقدر ہوا صلاۃ پڑھی پھر امام کے خطبہ سے فارغ ہوجانے تک خاموش رہا پھر اس کے ساتھ صلاۃ اداکی تو اس جمعہ سے لے کر دوسرے جمعہ تک اور مزید تین دن تک کی بخشش کردی جاتی ہے۔ (صحیح مسلم)

          ۹۔ سورج ڈھلتے ہی جمعہ قائم کرنے میں جلدی کرنا۔ انس بن مالک رضی اللہ عنہ فرماتے ہیں : سورج ڈھلتے ہی نبی ﷺ صلاۃ جمعہ پڑھا کرتے تھے ۔ نیز فرمایا: ہم جمعہ جلدی پڑھاکرتے تھے اور جمعہ کے بعد ہی قیلولہ کرتے تھے۔(صحیح بخاری)سلمہ بن اکوع رضی اللہ عنہ کاقول ہے: ہم سورج کا زوال ہوتے ہی رسول اﷲ ﷺ کے ساتھ جمعہ پڑھ لیا کرتے تھے پھر واپس ہوتے تو سایہ تلاش کیا کرتے (صحیح مسلم)

          ۱۰۔ جمعہ کی دونوں رکعتوں میں سورہ اعلی اور غاشیہ یا سورہ جمعہ اور منافقون کی تلاوت ۔ نعمان بن بشیر رضی اللہ عنہ فرماتے ہیں : رسول اﷲ ﷺ عیدین اور جمعہ میں (سبح اسم ربک الأعلی) اور (ہل أتاک حدیث الغاشیۃ) پڑھا کرتے تھے ۔(صحیح مسلم) عبد اﷲ بن عباس رضی اللہ عنہ سے مروی ہے کہ نبی ﷺ صلاۃ جمعہ میں سورہ جمعہ اور منافقون پڑھاکرتے تھے (صحیح مسلم)

          ۱۱۔ صلاۃ جمعہ کے بعد دو یا چار رکعتیں بطور سنت پڑھنا، مسجد میں پڑھنے والا چار رکعتیں پڑھے اور گھر میں پڑھنے والا دو رکعتیں پڑھے۔ عبد اﷲ بن عمر رضی اللہ عنہما فرماتے ہیں : نبی ﷺ جمعہ کے بعد کوئی صلاۃ نہیں پڑھتے تھے یہاں تک کہ گھر واپس پلٹ کرجاتے اور دو رکعتیں پڑھتے۔ (متفق علیہ) ابوہریرہ رضی اللہ عنہ بیان کرتے ہیں کہ رسول اﷲ ﷺ نے ارشاد فرمایا: جب تم میں سے کوئی صلاۃ جمعہ پڑھے تو اس کے بعد چار رکعتیں پڑھے۔(صحیح مسلم)

هذا والله أعلم وصلى الله على نبينا وسلم

اعداد :   عبد الہادی عبد الخالق مدنی 

 

 

 

 

 

أخلاق الداعية (2)

داعی کے اخلاق واوصاف (2)

تواضع

تواضع تکبر کی ضد ہے، داعی اپنی قدر پہچانے اور دوسروں کی تحقیر سے بچے۔ داعی یہ بات یاد رکھے کہ جس شاخ میں پھل لگتے ہیں وہ شاخ جھک جایا کرتی ہے۔ حدیث میں ہے: عَنْ أَبِي هُرَيْرَةَ  رضی اللہ عنہ  عَنْ رَسُولِ اللَّهِ r قَالَ : مَا تَوَاضَعَ أَحَدٌ لِلَّهِ إِلَّا رَفَعَهُ اللَّهُ (رواه مسلم) ابوہریرہ  رضی اللہ عنہ  سے روایت ہے کہ رسول اللہ  صلی اللہ علیہ وسلم  نے ارشاد فرمایا: جو آدمی اللہ واسطے تواضع اختیار کرتا ہے اللہ اسے بلند کرتا ہے۔ (مسلم)

حلم ورفق

حلم ورفق اور نرمی وبردباری داعی کی اہم صفات میں سے ہے۔اللہ کے رسول  صلی اللہ علیہ وسلم  کے بارے میں اللہ تعالی نے ارشاد فرمایا:

ﵟفَبِمَا رَحۡمَةٖ مِّنَ ٱللَّهِ لِنتَ لَهُمۡۖ وَلَوۡ كُنتَ فَظًّا غَلِيظَ ٱلۡقَلۡبِ لَٱنفَضُّواْ مِنۡ حَوۡلِكَۖﵞ [آل عمران: 159] 

(ترجمہ:اللہ تعالی کی رحمت کے باعث آپ ان پر رحم دل ہیں اگر آپ بدزبان اور سخت دل ہوتے تو یہ سب آپ کے پاس سے چھٹ جاتے)۔

موسی اور ہارون علیہم السلام کو فرعون کے پاس بھیجتے ہوئے اللہ تعالی نے نرمی اختیار کرنے کی نصیحت کی۔ ارشاد فرمایا:

ﵟٱذۡهَبَآ إِلَىٰ فِرۡعَوۡنَ إِنَّهُۥ طَغَىٰ * فَقُولَا لَهُۥ قَوۡلٗا لَّيِّنٗا لَّعَلَّهُۥ يَتَذَكَّرُ أَوۡ يَخۡشَىٰﵞ [طه: 43-44] 

( ترجمہ:تم دونوں فرعون کے پاس جاؤ اس نے بڑی سرکشی کی ہے۔ اسے نرمی سے سمجھاؤ کہ شاید وہ سمجھ لے یا ڈرجائے)۔

نیز حدیث میں ہے: عَنْ أَنَسِ بْنِ مَالِكٍ  رضی اللہ عنہ  عَنْ النَّبِيِّ r قَالَ يَسِّرُوا وَلَا تُعَسِّرُوا وَبَشِّرُوا وَلَا تُنَفِّرُوا. (رواه البخاري ومسلم) انس بن مالک  رضی اللہ عنہ  سے روایت ہے کہ نبی  صلی اللہ علیہ وسلم  نے ارشاد فرمایا: آسانی کرو، دشواری مت  کرو، خوشخبری سناؤ اور  نفرت مت دلاؤ۔ (بخاری ومسلم)

‘صبر وبرداشت

دعوت کی راہ مشکلات کی راہ ہے، صبر کے بغیر کوئی دعوتی عمل انجام نہیں دیاجاسکتا۔لقمان علیہ السلام نے اپنے بیٹے کو جو نصیحت کی تھی اسے اللہ تعالی نے قرآن مجید میں ذکر کیا ہے، ارشاد ہے:

ﵟيَٰبُنَيَّ أَقِمِ ٱلصَّلَوٰةَ وَأۡمُرۡ بِٱلۡمَعۡرُوفِ وَٱنۡهَ عَنِ ٱلۡمُنكَرِ وَٱصۡبِرۡ عَلَىٰ مَآ أَصَابَكَۖ إِنَّ ذَٰلِكَ مِنۡ عَزۡمِ ٱلۡأُمُورِﵞ [لقمان: 17] 

(ترجمہ:اے میرے پیارے بیٹے! صلاۃ قائم کرو، اچھے کاموں کی نصیحت کرتے رہو، برے کاموں سے منع کیا کرو، اور جو مصیبت تم پر آجائے اس پر صبر کرو۔ یقین مانو کہ یہ بڑے تاکیدی کاموں میں سے ہے)۔

سورۂ عصر میں اللہ تعالی نے جن چار صفات کو خسارہ سے محفوظ رہنے کا ذریعہ بتایا ہے ان میں سے ایک صفت صبر ہے۔

داعی کو صبر وبرداشت کا خوگر ہونا چاہئے۔ وہ اپنی دعوت میں کسی اکتاہٹ کے بغیر پیہم لگا رہے۔نیز دعوت کی راہ میں پیش آنے والی تمام مشکلات کا خندہ پیشانی کے ساتھ ڈٹ کر مقابلہ کرے۔

یہ اس روئے زمین پر اللہ کی سنت ہے کہ ہر داعیٔ حق کو اذیتوں کا سامنا کرنا پڑتا ہے۔ انبیاء کی تاریخ ہمارے سامنے ہے، کس طرح ان کا مذاق اڑایاگیا، ان کے ساتھ تمسخر کیا گیا، ان کو بدنام اور رسوا کرنے کی کوشش ہوئی، ان کو قتل کی دھمکی دی گئی  بلکہ قتل بھی کیا گیا، فرعون نے موسی علیہ السلام کے بارے میں جو کچھ  کہا تھا قرآن پاک میں اللہ تعالی نے بیان کیا ہے، ارشاد ہے:

ﵟوَقَالَ فِرۡعَوۡنُ ذَرُونِيٓ أَقۡتُلۡ مُوسَىٰ وَلۡيَدۡعُ رَبَّهُۥٓۖ إِنِّيٓ أَخَافُ أَن يُبَدِّلَ دِينَكُمۡ أَوۡ أَن يُظۡهِرَ فِي ٱلۡأَرۡضِ ٱلۡفَسَادَﵞ [غافر: 26] 

(ترجمہ: اور فرعون نے کہا کہ مجھے چھوڑو کہ میں موسی کو مار ڈالوں اور اسے چاہئے کہ اپنے رب کو پکارے، مجھے تو ڈر ہے کہ یہ کہیں تمھارا دین نہ بدل ڈالے یا ملک میں کوئی بہت بڑا فساد نہ برپا کردے)۔

یہودیوں کے بارے میں اللہ تعالی کا ارشاد ہے:

ﵟذَٰلِكَ بِأَنَّهُمۡ كَانُواْ يَكۡفُرُونَ بِـَٔايَٰتِ ٱللَّهِ وَيَقۡتُلُونَ ٱلۡأَنۢبِيَآءَ بِغَيۡرِ حَقّٖۚ ذَٰلِكَ بِمَا عَصَواْ وَّكَانُواْ يَعۡتَدُونَﵞ [آل عمران: 112] 

(ترجمہ: یہ اس لئے کہ یہ لوگ اللہ تعالی کی آیتوں سے کفر کرتے تھے اور ناحق انبیاء کو قتل کرتے تھے)۔

عیسی علیہ السلام کو ان کے دشمنوں نے بزعم خویش پھانسی پر لٹکادیا لیکن اللہ تعالی نے حفاظت فرمائی اور زندہ آسمان پر اٹھالیا۔

خاتم الانبیاء محمد  صلی اللہ علیہ وسلم  کے خلاف چالیں چلی گئیں ، آپ کو قتل کرنے کی کوشش کی گئی، آپ کو آپ کا وطن چھوڑنے کے لئے مجبور کیا گیا، آپ کو ساحر ودیوانہ کہا گیا، ان سب کے باوجود آپ نے صبر کا دامن نہیں چھوڑا۔

داعی کے لئے انبیاء ورسل کی زندگیوں میں بہترین اسوہ ہے، داعی کو بھی کبھی صبر کا دامن اپنے ہاتھ سے نہیں چھوڑنا چاہئے۔ اللہ تعالی کا ارشاد ہے:

ﵟإِنَّهُۥ مَن يَتَّقِ وَيَصۡبِرۡ فَإِنَّ ٱللَّهَ لَا يُضِيعُ أَجۡرَ ٱلۡمُحۡسِنِينَﵞ [يوسف: 90] 

(ترجمہ: بات یہ ہے کہ جو بھی پرہیزگاری اور صبر کرےتو اللہ تعالی کسی نیکوکار کا اجر ضائع نہیں کرتا)۔

هذا والله أعلم وصلى الله على نبينا وسلم

اعداد :   عبد الہادی عبد الخالق مدنی